काठमाडौं । फिफा विश्वकप अन्तर्गत इरान र न्युजिल्यान्डबीच भएको प्रतिस्पर्धात्मक खेल २–२ को बराबरीमा सकिएको छ । लस एन्जलसस्थित रंगशालामा मंगलबार बिहान सम्पन्न खेलमा न्युजिल्यान्डले सुरुआतमै अग्रता बनाएको थियो । खेलको सातौँ मिनेटमा एलिजाह जस्टले गोल गर्दै टोलीलाई १–० को स्थितिमा पुर्‍याए ।

इरानले भने पहिलो हाफमै खेलमा पुनरागमन गर्‍यो । ३२औँ मिनेटमा रामिन रेजाइयनले गोल गर्दै खेल १–१ को बराबरीमा ल्याए ।

दोस्रो हाफमा एलिजाह जस्टले व्यक्तिगत दोस्रो गोल गर्दै ५५औँ मिनेटमा न्युजिल्यान्डलाई फेरि अग्रता दिलाए । तर इरानले त्यसको नौ मिनेटपछि नै जवाफ फर्कायो। ६४औँ मिनेटमा मोहम्मद मोहेबीले गोल गरेपछि खेल पुनः बराबरीमा पुगेको थियो । 

बाँकी समयमा दुवै टोलीले अवसर सिर्जना गरे पनि थप गोल निस्कन नसक्दा खेल २–२ को बराबरीमा टुंगियो ।