काठमाडौं । रसुवाको टिमुरे हुँदै चीन प्रवेश गर्ने सडक तथा पुललगायतका भौतिक संरचना बाढीका कारण क्षतिग्रस्त भएपछि अध्यागमन विभागले हुम्लास्थित हिल्सा नाकाबाट नेपाल प्रवेश गर्ने विदेशी नागरिकका लागि अस्थायी व्यवस्था गरेको छ । विभागका अनुसार कैलाश मानसरोवर तीर्थयात्राका लागि रसुवागढी नाकाबाट चीन प्रवेश गरेका तीर्थयात्रीहरू बाढीका कारण सोही मार्ग हुँदै नेपाल फर्कन सक्ने अवस्था नरहेपछि हिल्सा र सिन्धुपाल्चोकको तातोपानी नाकालाई वैकल्पिक मार्गका रूपमा प्रयोग गर्न सक्ने व्यवस्था गरिएको हो ।

हालको विषम परिस्थितिलाई ध्यानमा राख्दै ११ भदौदेखि एक सातासम्म हिल्सा नाकाबाट नेपाल फर्किने कैलाश मानसरोवर तीर्थयात्रीबाट निषेधित क्षेत्रको पदयात्रा दस्तुर नलिने निर्णय गरिएको विभागले जनाएको छ ।

यो सुविधा रसुवास्थित अध्यागमन कार्यालयबाट चीन प्रस्थान अनुमति लिएका र हिल्सा नाकाबाट नेपाल फर्किने विदेशी कैलाश मानसरोवर तीर्थयात्रीका लागि मात्र लागू हुनेछ ।

विभागले पदयात्रा अनुमति लिनुपर्ने व्यवस्था भने यथावत् रहेको जनाएको छ । साथै, विदेशी नागरिक तथा ट्रेकिङ गाइडको बीमा र ट्रेकिङ गाइडसम्बन्धी प्रचलित व्यवस्था अनिवार्य गरिएको छ ।

तीर्थयात्रीको आवागमन सहज बनाउन विभागले कूटनीतिक नियोग तथा सम्बन्धित निकायसँग आवश्यक समन्वय गरिरहेको जनाएको छ ।