काठमाडौं । स्कोडा नेपालको आधिकारिक वितरक एमएडब्लु एक्स्पान्ज प्रालिले नाडा अटो शो २०२६ मा नयाँ जेनेरेसन स्कोडा कोडियाक सार्वजनिक गरेको छ । भृकुटीमण्डपमा आयोजित अटो शोमा कम्पनीले ‘रियल लक्जरी, एज इट सुड बी’ नारासहित सात सिटे लक्जरी एसयूभी सार्वजनिक गरेको हो ।

कम्पनीका अनुसार, नयाँ कोडियाकमा चेक डिजाइन र फक्सवागन ग्रुपको इन्जिनियरिङ संयोजन गरिएको छ । यसमा लामो यात्राका लागि एर्गो सिट्स, म्याट्रिक्स एलईडी हेडलाइट्स तथा स्मार्ट डायल्सजस्ता फिचर समावेश छन् ।

स्कोडा नेपालका कार्यकारी निर्देशक रौनक अग्रवालले नयाँ कोडियाकमार्फत नेपालमा इमानदार, परिष्कृत र अनावश्यक तडकभडकविहीन युरोपेली लक्जरीको अवधारणा प्रस्तुत गरिएको बताएका छन् ।

नयाँ जेनेरेसन कोडियाक लाउन्ज, स्पोर्टलाइन र सिलेक्सन एल एन्ड के गरी तीन भेरियन्टमा उपलब्ध छ । लाउन्जको मूल्य २ करोड १९ लाख ९० हजार रुपैयाँ तोकिएको छ भने स्पोर्टलाइन र सिलेक्सन एल एन्ड के दुवैको मूल्य २ करोड ३९ लाख ९० हजार रुपैयाँ रहेको कम्पनीले जनाएको छ ।

कोडियाक अगस्ट २५ देखि ३० सम्म भृकुटीमण्डपमा जारी नाडा अटो शोको स्कोडा पेभिलियनमा अवलोकनका लागि राखिएको छ । देशभरका आधिकारिक स्कोडा नेपाल शोरुमबाट यसको बुकिङ खुला गरिएको कम्पनीले जनाएको छ ।