काठमाडौं । प्रधानमन्त्री वालेन्द्र शाह र नेपाल भ्रमणमा रहेका भारतीय स्थल सेनाध्यक्ष धीरज सेठबीच मंगलबार भेटवार्ता हुने भएको छ । नेपाली सेनाका प्रवक्ता एवं सहायक रथी राजाराम बस्नेतका अनुसार प्रधानमन्त्री निवास बालुवाटारमा मंगलबार दिउँसो भेटवार्ताको तयारी गरिएको हो । 

चार दिने औपचारिक भ्रमणका क्रममा नेपाल आएका सेनाध्यक्ष सेठ भेटवार्तापछि बुधबार स्वदेश फर्किने कार्यक्रम छ । यसअघि सोमबार राष्ट्रपति भवन शीतल निवासमा आयोजित विशेष समारोहमा राष्ट्रपति रामचन्द्र पौडेलले सेनाध्यक्ष सेठलाई नेपाली सेनाको मानार्थ महारथी दर्जा प्रदान गरेका थिए । 

नेपाल र भारतबीच सन् १९५० देखि एकअर्का देशका सेना प्रमुखलाई मानार्थ महारथीको दर्जा दिने परम्परा रहँदै आएको छ । सोमबार नै सेनाध्यक्ष सेठले टुँडिखेलस्थित सैनिक मञ्चमा रहेको वीर स्मारकमा पुष्पगुच्छा अर्पण गरी शहीदप्रति श्रद्धाञ्जली व्यक्त गरेका थिए । 

उनले सैनिक मुख्यालय जङ्गी अड्डामा सैनिक सम्मान गारत निरीक्षण गर्नुका साथै परिसरमा वृक्षारोपण र नेपाली सेनालाई स्वास्थ्य सामग्री हस्तान्तरणसमेत गरेका थिए ।