काठमाडौं । नेपाल राष्ट्र बैंकका गभर्नर र सञ्चालक समितिका सदस्यको कार्यकाल अब ३ वर्षमा सीमित हुने भएको छ । नेपाल राष्ट्र बैंक ऐन, २०५८ लाई संशोधन गर्न बनेको विधेयकमाथि छलफलका क्रममा गभर्नर र सञ्चालक समितिका सदस्यको कार्यकाल ३ वर्ष कायम गर्ने सहमति जुटेको हो ।

बिहीबार सिंहदरबारमा बसेको प्रतिनिधिसभाअन्तर्गतको अर्थ समिति बैठकले गभर्नर र सञ्चालकको कार्यकाल घटाउने निर्णय गरेको हो। हाल गभर्नर र सञ्चालक समितिका सदस्यको कार्यकाल ५ वर्षको छ ।

समिति सभापति कृष्णहरि बुढाथोकीका अनुसार नयाँ बन्ने ऐनमा गभर्नर र सञ्चालक समितिका सदस्यको कार्यकाल ३ वर्षमा सीमित गरिनेछ ।

यस्तै, डेपुटी गभर्नर र सञ्चालकको प्रारम्भिक पदावधि पनि ३ वर्ष कायम गरिने भएको छ । कार्यसम्पादन मूल्यांकन गर्दा काम सन्तोषजनक देखिएमा नेपाल सरकारले थप २ वर्ष पदावधि बढाउन सक्ने व्यवस्था विधेयकमा राख्ने निर्णय भएको सभापति बुढाथोकीले बताए ।

नेपाल राष्ट्र बैंक ऐन, २०५८ लाई संशोधन गर्न बनेको विधेयकमाथि अर्थ समितिमा शुक्रबार पनि दफावार छलफल हुने कार्यसूची छ ।