काठमाडौं । नर्वेमाथि रोमाञ्चक पुनरागमन जित निकाल्दै इंग्ल्यान्ड फिफा विश्वकप फुटबलको सेमिफाइनलमा प्रवेश गरेको छ । क्वार्टरफाइनलमा नर्वेलाई २–१ ले पराजित गर्दै इंग्ल्यान्डले अन्तिम चारमा स्थान पक्का गरेको हो । 

इंग्ल्यान्डको जितमा जुड बेलिङ्घमले दुवै गोल गर्दै टोलीका नायक बने । खेलको ३६औँ मिनेटमा एन्ड्रियस इस्लेअपले गोल गर्दै नर्वेलाई अग्रता दिलाएका थिए । तर पहिलो हाफ सकिनुअघि बेलिङ्घमले बराबरी गोल फर्काउँदै इंग्ल्यान्डलाई खेलमा पुनरागमन गराए ।

दोस्रो हाफको ५४औँ मिनेटमा टोबियास हेगमले नर्वेका लागि गोल गरेका थिए । तर गोल हुनुअघि एर्लिङ हालाण्डले इंग्ल्यान्डका एक डिफेन्डरमाथि फाउल गरेको निष्कर्ष भिडियो सहायक रेफ्री (भीएआर) को परीक्षणपछि निकालिएपछि उक्त गोल रद्द गरिएको थियो ।

निर्धारित ९० मिनेट तथा इन्जुरी समयमा दुवै टोलीबाट थप गोल हुन नसकेपछि खेल अतिरिक्त समयमा पुगेको थियो ।

अतिरिक्त समयको ९३औँ मिनेटमा बेलिङ्घमले व्यक्तिगत दोस्रो तथा टोलीका लागि निर्णायक गोल गर्दै इंग्ल्यान्डलाई २–१ को जित दिलाए ।

यससँगै इंग्ल्यान्डले सेमिफाइनलमा स्थान सुरक्षित गरेको छ । अब उसले अर्जेन्टिना र स्विट्जरल्यान्डबीच हुने क्वार्टरफाइनलको विजेतासँग फाइनल प्रवेशका लागि प्रतिस्पर्धा गर्नेछ ।