काठमाडौं । इरानमा पक्राउ परेका नेपाली युवा अमृत झाको बारेमा सरकारले नै झुट बोलेको खुलेको छ । एक महिना अगाडि नै रिहा भएको भनेर नेपालको परराष्ट्र मन्त्रालयले दिएको जवाफ झुटो भ्एको हो । 

सोमबार सोमबार एक विज्ञप्ति जारी गर्दै मन्त्रालयले झा अहिले पनि इरानमा थुनामै रहेको जानकारी दिँदै गलत सूचनाबाट पर्न गएको अन्योलप्रति माफी मागेको छ । झाको रिहाइका लागि कूटनीतिक प्रयास भइरहेको मन्त्रालयले जारी गरेको विज्ञप्तिमा उल्लेख छ । 

उदयपुरको गाईघाटका ३० वर्षीय झालाई इरानी सुरक्षा फौजले होर्मुजको जलघाटी क्षेत्रबाट नियन्त्रणमा लिएको थियो । इरानमा तेल लिन जाने क्रममा होर्मुज क्षेत्रको बन्दर अब्बास बन्दरगाहबाट उनी पक्राउ परेका थिए ।

झा दुबईको एक पानी जहाज कम्पनीमा क्याप्टेनका रूपमा काम गर्दै आएका थिए । वैदेशिक रोजगारीका लागि उनी दुई वर्षअघि दुबई गएका थिए । उनी रिहा भएको खबर सार्वजनिक गरेको एक महिनापछि परराष्ट्र मन्त्रालयले सूचना गलत भएको भन्दै माफी मागेको हो ।