काठमाडौँ । प्रतिनिधिसभाको महिला तथा सामाजिक मामिला समितिमा सांसदहरूले लैङ्गिक शिक्षा अनिवार्य गर्नुपर्ने बताएका छन् । बिहीबार सिंहदरबारस्थित समितिको कक्षमा बसेको बैठकमा अधिकांश सांसदहरूले विद्यालय तहमा लैङ्गिक शिक्षा अनिवार्य गरिनुपर्ने बताएका हुन् । 

बैठकमा सांसदहरूले अझे पनि समाजमा लैंगिक रूपमा विभेद कायमै रहेका कारण यसको निराकरण गर्न विद्यालय तहबाटै काम गर्नुपर्ने बताएका हुन् । बैठकमा युनेस्को नेपालका शिक्षा शाखा प्रमुख ध्रुवराज रेग्मीले युनेस्कोले सरकारसँगको सहकार्यमा शिक्षक शिक्षा दिन थालिएको बताए । 

उनले भने,‘ शिक्षकका विषयमा विश्वभरि नै कुराहरू उठ्न थालेका छन् । शिक्षक नभईकन केही हुँदैन भन्ने छ । अब हामीले शिक्षकलाई आईसीटीमा लैजानुपर्छ । शिक्षकलाई कम्प्युटरसम्बन्धी ज्ञान हुनुपर्‍यो । विद्यार्थी जान्ने र शिक्षक नजान्ने भयो भने समस्या हुन्छ । शिक्षकहरूलाई यही विषयवस्तुको ज्ञान दिन हामीले पाँच दिनको तालिम दिने निर्णय गरेका छौँ ।’ 

पछिल्लो समय अधिकांश बालबालिकाहरू नयाँ प्रविधिसँग नजिक रहने गरेकाले उनीहरूलाई प्रविधिको सुरक्षित प्रयोग गर्न विद्यालय तहबाटै सिकाइ आरम्भ गर्नुपर्ने उनको भनाइ थियो ।