काठमाडौँ । नेपाल आयल निगमले पेट्रोल, डिजेल र मट्टितेलको मूल्य प्रतिलिटर एक रुपैंयाँले घटाएको छ ।

इन्डियन आयल कर्पोरेशनबाट प्राप्त नयाँ खरिद मूल्यअनुसार पेट्रोल प्रतिलिटर  एक रुपैयाँ २६ पैसा, डिजेल प्रतिलिटर ८३ पैसाले घटेर आएकाले निगम सञ्चालक समितिले गए राति १२ बजेपछि लागू हुने गरी पेट्रोल, डिजेल र मट्टितेलको मूल्य घटाएको हो । 
    
निगमका अनुसार चारआली, बिराटनगर, जनकपुर, अमलेखगञ्ज, भलवारी, नेपालगञ्ज, धनगढी र वीरगञ्जका लागि पेट्रोलको मूल्य प्रतिलिटर एक सय ६३ रुपैयाँ ५० पैसा, डिजेल र मट्टितेल एक सय ५३ रुपैयाँ ५० पैसा कायम भएको छ ।
    

साथै सुर्खेत र दाङका लागि पेट्रोल प्रतिलिटर एक सय ६५, डिजेल र मट्टितेल प्रतिलिटर एक सय ५५ कायम भएको छ । साथै काठमाडौँ, पोखरा र दीपायलका लागि पेट्रोल प्रतिलिटर एक सय ६६, डिजेल र मट्टितेल एक सय ५६ कायम भएको छ ।