काठमाडौँ । ताप्लेजुङमा नेकपा एमालेको भ्रातृ संगठन अनेरास्ववियुका जिल्ला सहसंयोजक विवेक बानियामाथि खुकुरी प्रहार भएको छ । 

सोमबार बिहान सवा १० बजे फुङलिङ नगरपालिका ४ पाथीभरा होटल नजिकै विवेक बानियामाथि खुकुरी प्रहार भएको कोशी प्रदेश प्रहरी कार्यालयका प्रवक्ता एवं एसपी ऋषिराम कंडेलले जानकारी दिए ।

बानियामाथि सोही होटल नजिक बस्ने ३२ वर्षीय प्रेमराज लिम्बूले खुकुरी प्रहार गरेको एसपी कंडेलले बताए । 

उनका अनुसार लिम्बु र बानियाबीच पुरानो लेनदेनको विषयमा झगडा भएको थियो । त्यसैबीच लिम्बूले खुकुरी प्रहार गरी बानियालाई घाइते बनाएका हुन् । 

बानियाको दाहिने घुँडामा चोट लागेको छ। उनको उपचारको लागि जिल्ला अस्पताल ताप्लेजुङमा लगिएको छ। प्रहरीका अनुसार उनी बोल्न सक्ने अवस्थामा छन्।

प्रेमराज लिम्बू घटनापछि फरार छन् । प्रहरीले उनको खोजी गरिरहेको छ । नेकपा एमालेका सचिव योगेश भट्टराईले यसमा संलग्न व्यक्तिमाथि कारबाही गर्न माग गरेका छन् । 

उनले सोमबार सामाजिक सञ्जालमा लेख्दै उपचारको व्यवस्‍था मिलाउन पनि माग गरेका हुन् ।

‘आज बिहान ताप्लेजुङ बजारमा अनेरास्ववियुका जिल्ला सह संयोजक कमरेड विवेक बानियामाथि भएको सांघातिक आक्रमणको घोर निन्दा गर्दछु । अपराधीलाई तत्काल कारबाही गर्न र घाइते बानियाको उपचारको व्यवस्था मिलाउन सरकारको गम्भीर ध्यानाकर्षण गर्दछु,’ उनले भनेका छन् ।