जनकपुरधाम । जनकपुरधाममा गुठीको अतिक्रमित जग्गा खाली गराउने अभियान सुरु भएको छ । शनिबार बिहानदेखि गिरनारी कुट्टीनजिक रहेको गोरधोइ पोखरीको अतिक्रमित डिलमा डोजर चलाएर संरचना हटाउन थालिएको हो ।

गुठी संस्थान जनकपुरधामले पोखरीको अतिक्रमित डिल खाली गराउन डोजर परिचालन गरेको हो । अतिक्रमित जग्गा खाली गर्न संस्थानले यसअघि साउन १ गते सार्वजनिक सूचना जारी गरेको थियो। त्यसपछि भदौ ५ गते जनकपुर नगर क्षेत्रमा माइकिङ गर्दै पुनः अतिक्रमित जग्गा खाली गर्न आग्रह गरिएको थियो ।

तर, पटक–पटक सूचना जारी गर्दा पनि अतिक्रमित जग्गा खाली नभएपछि गुठी संस्थानले डोजर लगाएर संरचना हटाउने अभियान थालेको हो ।

गुठी संस्थान जनकपुरधामका किशोरकुमार झाले पहिलो चरणमा गोरधोइ पोखरीको अतिक्रमणमा परेको डिल खाली गराउन थालिएको जानकारी दिए । उनका अनुसार जनकपुरधाम क्षेत्रमा रहेका करिब ५० वटा पोखरीमध्ये पहिलो चरणमा सातवटा पोखरीलाई अतिक्रमणमुक्त गराउने तयारी गरिएको छ ।

अतिक्रमित संरचना हटाउने क्रममा सम्भावित अवरोध र सुरक्षालाई मध्यनजर गर्दै ठूलो संख्यामा सुरक्षाकर्मीसमेत परिचालन गरिएको छ ।