काठमाडौं । कर्णाली प्रदेश सरकारमा नेपाली कम्युनिस्ट पार्टी (नेकपा) र नेकपा (एमाले)बीच मन्त्रालय बाँडफाँटमा सहमति भएको छ । मुख्यमन्त्री मङ्गलबहादुर शाहीले प्रदेशसभाबाट विश्वासको मत लिनुअघि दुई दलबीच मन्त्रालय भागबण्डामा सहमति भएको हो । 

शाहीले आज प्रदेशसभाबाट विश्वासको मत लिँदैछन् । सहमतिअनुसार नेकपाले मुख्यमन्त्रीसहित चार मन्त्रालय पाउने भएको छ भने एमालेले तीन मन्त्रालय पाउनेछ । मुख्यमन्त्री शाही र एमाले संसदीय दलका नेता यामलाल कँडेलले सहमति पत्रमा हस्ताक्षर गरेका छन् ।

सहमतिअनुसार नेकपाले भौतिक पूर्वाधार, भूमि तथा उद्योग मन्त्रालयको जिम्मेवारी लिनेछ भने एमालेले आर्थिक मामिला तथा योजना, सामाजिक विकास र जलस्रोत तथा ऊर्जा मन्त्रालय सम्हाल्नेछ ।

संविधानको धारा १६८ को उपधारा ९ बमोजिम मुख्यमन्त्रीमा नियुक्त भएको ३० दिनभित्र प्रदेशसभाबाट विश्वासको मत प्राप्त गर्नुपर्ने व्यवस्था छ । सोही व्यवस्थाअनुसार शाहीले आज विश्वासको मत लिन लागेका हुन् ।