काठमाडौं । नेपालको अटोमोबाइल क्षेत्रको सबैभन्दा ठूलो प्रदर्शनी ‘नाडा अटो शो २०२६’ भदौ ९ देखि १४ गतेसम्म काठमाडौंको भृकुटीमण्डपमा आयोजना हुने भएको छ । आयोजक संस्था नाडा अटोमोबाइल्स एसोसिएसन अफ नेपालले उपत्यकामा पत्रकार सम्मेलनको आयोजना गरी प्रदर्शनीबारे जानकारी दिएको हो । 

नाडाले आफ्नो ५०औँ वार्षिकोत्सवको अवसरमा अटो शोको १८औँ संस्करणलाई ‘स्वर्ण उत्सव संस्करण’ का रूपमा आयोजना गर्न लागेको जानकारी दिएको छ । 
६ दिनसम्म सञ्चालन हुने प्रदर्शनीमा नयाँ सवारीसाधन, विद्युतीय तथा अन्य प्रविधि, पार्टपुर्जा र अटोमोबाइलसम्बन्धी विभिन्न सेवा प्रदर्शन गरिनेछ ।

करिब ३ लाख वर्गफिट क्षेत्रफलमा २०० भन्दा बढी स्टल रहने प्रदर्शनीमा २३ ब्रान्डका प्यासेन्जर कार, १७ ब्रान्डका लाइट कमर्सियल भेहिकल र १३ ब्रान्डका दुईपाङ्ग्रे सवारीसाधन रहने नाडाले जनाएको छ ।

त्यस्तै, १० वटा बैंक, वित्तीय संस्था तथा बीमा सेवा प्रदायक र ७० वटा अटोमोटिभ पार्टपुर्जा तथा सेवासम्बन्धी कम्पनीको सहभागिता रहनेछ । टायर, लुब्रिकेन्ट्स, ब्याट्री, हेल्मेट, एसेसरिज तथा ग्यारेज उपकरणलगायत सामग्री पनि प्रदर्शनीमा राखिनेछन् ।

भविष्यको मोबिलिटी प्रविधिबारे जानकारी तथा अनुभव प्रदान गर्ने उद्देश्यले जी–१ ह्युमनोइड रोबोट र जीओ २ क्वाड्रुपेड रोबोट समेत प्रदर्शनीमा राखिने आयोजकले जनाएको छ ।

नाडाले ६ दिनमा करिब २ लाख दर्शकले अटो शो अवलोकन गर्ने अपेक्षा गरेको छ । प्रदर्शनीको टिकट खल्ती एपमार्फत अग्रिम खरिद गर्न सकिनेछ भने निश्चित अवधिमा अग्रिम टिकट खरिद गर्दा ५० प्रतिशतसम्म क्यासब्याकको व्यवस्था गरिएको छ ।

अवलोकनकर्ताको सहजताका लागि ट्राफिक सूचना डेस्क, मिडिया डेस्क, क्याफेटेरिया तथा पार्किङको व्यवस्था गरिनेछ । पार्किङका लागि नेपाल पुलिस क्लबको ब्लु पेभिलियनको भूमिगत पार्किङ तथा सिंहदरबारस्थित नेसनल ट्रेडिङ परिसर प्रयोग गर्न सकिने नाडाले जनाएको छ ।

प्रदर्शनीस्थलमा आपत्कालीन स्वास्थ्य टोली, सीसीटीभी निगरानी, आगलागी नियन्त्रण तथा अन्य सुरक्षा व्यवस्था मिलाइनेछ। साथै, प्रदर्शनीलाई ह्विलचेयरमैत्री बनाइने आयोजकले जनाएको छ ।