काठमाडौं । सुनसरीको देवानगञ्ज गाउँपालिका–३, कप्तानगञ्जमा साउन १० गते भएको घटनामा मृत्यु भएका रवीन्द्रकुमार मेहताको परिवार र सरकारबीच सातबुँदे सहमति भएको छ । मेहताका अभिभावक र गृहमन्त्री सुधन गुरुङबीच भएको सहमतिअनुसार मेहतालाई शहीद घोषणा गर्ने प्रक्रिया तत्काल अघि बढाइने भएको हो ।

सहमतिका मुख्य बुँदा यस्ता छन्ः
साउन १० गते राति देवानगञ्ज–३ मा भएको घटनाको निष्पक्ष र प्रभावकारी छानबिन गरी दोषीमाथि प्रचलित कानुनअनुसार तत्काल कारबाही अघि बढाउने ।

देवानगञ्ज–३ स्थित मदरसा तथा त्यससँग सम्बन्धित विषयको कानुनी हैसियतबारे आवश्यक छानबिन तत्काल सुरु गर्ने ।

मृतकका परिवारका एक जना योग्य सदस्यलाई रोजगारी उपलब्ध गराउन आवश्यक पहल गर्ने ।

घटनाको अध्ययनका लागि गठित छानबिन समितिको प्रतिवेदनमा उल्लेखित सुझाव तथा सिफारिसलाई प्रचलित कानुनअनुसार कार्यान्वयन गर्ने प्रक्रिया अघि बढाउने ।

मृतकको शव नेपाली सेनाको हेलिकोप्टरमार्फत देवानगञ्ज–३, सुनसरी लैजाने व्यवस्था गरी दाहसंस्कारको प्रबन्ध गर्ने ।

घटनामा मृत्यु भएका तीनै जनाको सम्झनामा स्थानीय सरकारसँग समन्वय गरी यसै वर्ष बजेट विनियोजन गरेर स्मृति पार्क निर्माण गर्ने ।

मृतक रवीन्द्रकुमार मेहतालाई शहीद घोषणा गर्ने प्रक्रिया तत्काल अघि बढाउने ।