काठमाडौं । काठमाडौंको गोकर्णेश्वरमा भएको भीषण आगलागीबाट काभ्रे चौरीदेउरालीका बेकरी व्यवसायी राजेन्द्र गौतमको घर तथा व्यवसाय पूर्णरूपमा ध्वस्त भएपछि उनी अहिले पीडादायी अवस्थाबाट गुज्रिरहेका छन् ।

आगलागीले गौतमको व्यवसाय मात्रै होइन, बस्दै आएको स्थानसमेत पूर्णरूपमा क्षति पुर्‍याएपछि उनको परिवारको दैनिकी नै प्रभावित बनेको छ । विपत्तिको यस्तो कठिन घडीमा विभिन्न संघ–संस्था तथा व्यक्तिहरूले गौतमलाई सहयोग गर्दै आएका छन् ।

यसैक्रममा काभ्रे चौरीदेउरालीका नेपाली कांग्रेसका युवा नेता तथा युवा व्यवसायीहरू नारायण थोकर, उस्पार सुनार, विश्व लामा र नेमा ज्ञानज्ञ लामाले पनि गौतमलाई आर्थिक सहयोग गरेका छन् ।

उनीहरूले समान रूपमा जनही ५ हजार रुपैयाँका दरले सहयोग, कुल २० हजार रुपैयाँ, प्रदान गरेका हुन् ।

आगलागीबाट घर र व्यवसाय गुमाएका गौतमलाई राहत तथा पुनःस्थापनामा सहयोग पुगोस् भन्ने उद्देश्यले आफूहरूले सहयोग गरेको उनीहरूको भनाइ छ ।

विपद्का बेला व्यक्तिगत तथा संस्थागत रूपमा अघि बढेका यस्ता सहयोगी हातले पीडित परिवारलाई आर्थिक राहत मात्रै नभई पुनः उठ्न सकिन्छ भन्ने हौसला र भरोसा पनि दिएको छ ।

गौतमको घर तथा व्यवसाय पुनः सञ्चालनका लागि अझै ठूलो सहयोग आवश्यक रहेको अवस्थामा उहाँलाई सहयोग गर्न चाहने व्यक्ति तथा संस्थाहरूले आ–आफ्नो तर्फबाट सक्दो सहयोग गर्नुपर्ने देखिन्छ ।