काठमाडौं । प्रधानमन्त्री बालेन शाह र सत्तारुढ राष्ट्रिय स्वतन्त्र पार्टी (रास्वपा)का सभापति रवि लामिछानेबीच प्रधानमन्त्रीको सरकारी निवास बालुवाटारमा भेटवार्ता भएको छ ।

सरकार र पार्टीबीच पछिल्लो समय बढ्दो संशय र तिक्तताबीच आइतबार साँझ भएको भेटवार्तामा उनीहरूबीच करिब ४५ मिनेट कुराकानी भएको बताइएको छ । प्रधानमन्त्री शाहलाई भेट्न सभापति लामिछाने साँझ बालुवाटार पुगेका थिए ।

भेटमा सरकार सञ्चालनमा पार्टीको भूमिका मुख्य विषय रहेको बताइएको छ । त्यसैगरी लामिछानेको आसन्न भारत भ्रमण तथा प्रधानमन्त्री शाहले गर्ने भनिएको भारत भ्रमणका विषयमा पनि छलफल भएको स्रोतले जनाएको छ ।

यस्तै, राजदूत छनोट, केही उच्च तहका नियुक्ति तथा सरकारका मन्त्रीहरूको कार्यप्रगति बारे पनि उनीहरूबीच छलफल भएको बताइएको छ ।

उच्च स्रोतका अनुसार पछिल्लो समय सरकार र सत्तारुढ दलबीच देखिएको असमझदारीका बीच भएको यो भेटलाई राजनीतिक रूपमा अर्थपूर्ण रूपमा हेरिएको छ ।