काठमाडौं । मल लिन भारत गएका बेला पक्राउ परेका सर्लाहीका किसान दाजुभाइ ३८ दिनपछि घर फर्किएका छन् । भारतको सीतामढी जिल्लास्थित व्यवहार अदालतका मुख्य न्यायाधीश अखिलेशकुमार झाको एकल इजलासले धरौटीमा रिहा गर्न आदेश दिएपछि उनीहरू हिजो नेपाल फर्किएका हुन् ।

बलरा नगरपालिका–५ का ६० वर्षीय नागेन्द्रप्रसाद सिंह र ५५ वर्षीय सुरेशप्रसाद सिंहलाई गत असार १७ गते भारतीय सीमा सुरक्षा बल (एसएसबी) र भारतीय कृषि विभागको संयुक्त टोलीले पक्राउ गरेको थियो ।

दुवै जना साइकलमा दुई बोरा युरिया र ६ बोरा डीएपी मल राखेर नेपाल फर्किने क्रममा पक्राउ परेका थिए । उनीहरूमाथि मल तस्करीको आरोप लगाउँदै सीतामढीको डुमरास्थित कारागारमा पठाइएको थियो ।

किसान दाजुभाइ पक्राउ परेको विषय सार्वजनिक भएपछि परराष्ट्रमन्त्री शिशिर खनालले चासो देखाएका थिए । त्यसपछि नयाँदिल्लीस्थित नेपाली दूतावासमार्फत भारत सरकारसँग कूटनीतिक समन्वयसमेत अघि बढाइएको थियो ।

अदालतले दुवै जनालाई जनही १० हजार भारतीय रुपैयाँ धरौटीमा रिहा गर्न आदेश दिएको हो । रिहा भएपछि उनीहरूलाई लिन परिवारका सदस्य भारत पुगेका थिए ।

धरौटीमा रिहा भए पनि सिंह दाजुभाइले मुद्दाको तारिखका लागि आगामी दिनमा भारतीय अदालतमा उपस्थित हुनुपर्नेछ ।