काठमाडौं । संसारकै १२औँ अग्लो पाकिस्तानस्थित ब्रोड पिक (८,०४७ मिटर) हिमाल आरोहणका क्रममा गएको भयानक हिमपहिरोमा परी कीर्तिमानी आरोही निर्मल पुर्जा (निम्सदाई) को नेतृत्वमा रहेको १० सदस्यीय अन्तर्राष्ट्रिय टोली बेपत्ता भएको छ ।

पाकिस्तानका पर्वतारोहण अधिकारीहरूका अनुसार काराकोरम पर्वतशृंखलामा रहेको ब्रोड पिकमा बिहीबार मध्याह्नतिर हिमपहिरो खसेको थियो । घटनालगत्तै आरोहण टोलीसँगको सञ्चार सम्पर्क विच्छेद भएको छ ।

बेपत्ता टोलीको विवरण
लापता टोलीमा निर्मल पुर्जासहित अनुभवी पर्वतारोहीहरू समावेश छन्ः

नेपाली आरोहीः ५ जना

अमेरिकी नागरिकः १ जना

चिनियाँ नागरिकः १ जना

ओमानी नागरिकः १ जना

अन्य सदस्यः २ जना

हेलिकोप्टरबाट उद्धारको तयारी
घटनापछि पाकिस्तानको अल्पाइन क्लबले विज्ञप्ति जारी गर्दै सरकारी निकायहरूसँग निरन्तर समन्वय भइरहेको र तत्काल खोज तथा उद्धार अभियान सुरु गर्न पहल भइरहेको जनाएको छ ।

‘हामी हेलिकोप्टरको सहयोग सुनिश्चित गर्दै उपलब्ध सबै स्रोतसाधन यथाशीघ्र परिचालन गर्ने प्रयासमा छौँ। सम्पूर्ण आरोहीको सकुशल उद्धारको कामना गर्दै यस कठिन घडीमा उनीहरूका परिवार र अन्तर्राष्ट्रिय पर्वतारोहण समुदायप्रति ऐक्यबद्धता व्यक्त गर्दछौँ,’ अल्पाइन क्लबले भनेको छ ।

मौसममा सुधार आउनासाथ उद्धारका लागि नेपाली र पाकिस्तानी सेनाका दक्ष टोलीसहित हेलिकोप्टर परिचालन गर्ने तयारी गरिएको छ । ब्रोड पिकलाई प्राविधिक रूपमा अत्यन्तै जोखिमपूर्ण र चुनौतीपूर्ण हिमाल मानिन्छ ।

पर्वतारोहणका सुपरहिरो निर्मल पुर्जा
पूर्व रोयल मरीन निर्मल पुर्जा विश्व पर्वतारोहण क्षेत्रका चर्चित नाम हुन् । ब्रिटिस सेनाको यात्राः सन् २००३ मा ब्रिटिस सेनामा भर्ती भई सन् २००९ मा उनी प्रतिष्ठित रोयल मरीन बनेका थिए ।

पहिलो आरोहणको कथाः सन् २०१२ मा सगरमाथा आधार शिविरको ट्रेकिङमा निस्किएका उनले अदम्य साहस देखाउँदै पहिलो पटकमै सगरमाथाको सफल आरोहण गरेका थिए ।

प्रोजेक्ट पोसिबलः सन् २०१९ मा संसारका ८,००० मिटरभन्दा अग्ला सबै १४ वटा हिमाल ६ महिना ६ दिनमै आरोहण गरेर उनले विश्वकीर्तिमान रचेका थिए ।