काठमाडौँ । कपिलवस्तुमा बसको ठक्करबाट मोटरसाइकलमा सवार दुई जनाको मृत्यु भएको छ । शुद्धोधन गाउँपालिका–६ बिमियास्थित हुलाकी सडकखण्डमा गएराति नेपालगञ्जबाट काठमाडौँतर्फ जाँदै गरेको मध्यपश्चिम जनसेवा यातायातको भे.१ ख ४५५२ नम्बरको बसले विपरीत दिशाबाट आउँदै गरेको लु.प्र.०१–००४ प ३८५६ नम्बरको सुपर स्प्लेन्डर मोटरसाइकललाई ठक्कर दिएको थियो ।

दुर्घटनामा मोटरसाइकलमा सवार दुवै जना गम्भीर घाइते भएका थिए । दुर्घटनाको खबर प्राप्त हुनासाथ इलाका प्रहरी कार्यालय पकडीबाट प्रहरी वरिष्ठ नायब निरीक्षकको कमाण्डमा सात जनाको प्रहरी टोली घटनास्थल पुगेको थियो ।

प्रहरीले घाइते दुवै जनाको उद्धार गरी उपचारका लागि जिल्ला अस्पताल तौलिहवा, कपिलवस्तु पठाएको थियो । उपचारका क्रममा चिकित्सकले आइतबार राति १ः५० बजे दुवै जनालाई मृत घोषणा गरेका हुन् ।

मृतक दुवै जनाको पहिचान खुल्न बाँकी रहेको प्रहरीले जनाएको छ । उनीहरूको शव जिल्ला अस्पताल तौलिहवामा राखिएको छ ।

दुर्घटनामा संलग्न मोटरसाइकल र बस तथा बसका सहचालक सल्यानको बनगाड कुपिण्डे नगरपालिका–५ खैरागार निवासी २१ वर्षीय सुनिल रानालाई जिल्ला प्रहरी कार्यालय कपिलवस्तुले नियन्त्रणमा लिएको छ ।

बस चालक सुर्खेतको गुर्भाकोट नगरपालिका–२ खरीगैरा निवासी २८ वर्षीय श्यामकुमार कामी भने रुपन्देहीमा प्रहरीको नियन्त्रणमा रहेका छन् । घटनाबारे थप अनुसन्धान भइरहेको प्रहरीले जनाएको छ ।