काठमाडौं । नेकपा (एमाले)का अध्यक्ष केपी शर्मा ओलीले समाजमा अराजकता फैलाउने र कानुनी राज्यको उल्लंघन गर्ने कामको नेतृत्व स्वयं सरकारले गरिरहेको आरोप लगाएका छन् ।

शुक्रबार ललितपुरको च्यासलस्थित पार्टी केन्द्रीय कार्यालयमा एमालेको नयाँ वेबसाइट तथा एपको नवीन संस्करण सार्वजनिक कार्यक्रममा बोल्दै अध्यक्ष ओलीले सरकारको आलोचना गर्ने वा विरोधमा उत्रिने युवाहरूलाई धम्की र त्रास देखाउने काम भइरहेको दाबी गरे ।

उनले विरोधका आवाज दबाउन घर, कार्यालय तथा सञ्चारमाध्यमका कार्यालय अगाडि सवारीसाधन तेर्स्याएर अवरोध सिर्जना गर्ने गरिएको आरोप लगाए । शान्तिपूर्ण रूपमा असहमति व्यक्त गर्ने तथा विरोध प्रदर्शन गर्ने नागरिकको संवैधानिक अधिकारमाथि समेत सरकारले अंकुश लगाउन खोजेको उनको भनाइ थियो ।

अध्यक्ष ओलीले सरकार तानाशाही र फासीवादी प्रवृत्तितर्फ उन्मुख भएको आरोप लगाउँदै संसद् र राज्यका तीनवटै अङ्गलाई कार्यकारीको इच्छाअनुसार सञ्चालन गर्न बाध्य पारिएको बताए। बजेटजस्तो महत्वपूर्ण विषयमा समेत केवल चार घण्टा छलफल गरेर पारित गरिएको घटनालाई उनले त्यसको उदाहरणका रूपमा प्रस्तुत गरे ।

फरक प्रसंगमा अध्यक्ष ओलीले एमाले कुनै अरूको सहारामा उभिएको पार्टी नभई आफ्नै बलमा स्थापित भएको राजनीतिक शक्ति भएको बताए । अनेकौँ आँधी, हुरी, तुफान र चुनौतीको सामना गर्दै एमाले दह्रो रूपमा अघि बढेको उल्लेख गर्दै उनले पार्टीसँग जस्तोसुकै परिस्थितिको सामना गरी त्यसलाई पराजित गर्ने क्षमता रहेको दाबी गरे ।