चितवन । राष्ट्रिय स्वतन्त्र पार्टी (रास्वपा)का वरिष्ठ नेतासमेत रहेका प्रधानमन्त्री वालेन्द्र शाह ‘बालेन’ पार्टीको प्रथम राष्ट्रिय महाधिवेशनमा सहभागी हुने भएका छन् । प्रधानमन्त्री शाह महाधिवेशनमा सहभागी हुने वा नहुने विषयमा विभिन्न चर्चा भइरहेका बेला उनी चितवन जाने कार्यक्रम तय भएको हो । 

प्रधानमन्त्रीका प्रेस विज्ञ दीपा दाहालले शाह महाधिवेशनमा सहभागी हुने जानकारी दिएकी छन् । रास्वपा स्रोतका अनुसार पार्टी सभापति रवि लामिछानेसँगै प्रधानमन्त्री शाहले महाधिवेशनको उद्घाटन गर्ने कार्यक्रम तय भएको छ । उद्घाटन समारोहमा उनले संक्षिप्त सम्बोधनसमेत गर्ने बताइएको छ ।

चार वर्षअघि स्थापना भएको रास्वपासँग प्रधानमन्त्री शाहसहित उनका समर्थकहरू गत पुस १३ गते पार्टीमा समाहित भएका थिए । त्यतिबेला भएको सहमतिअनुसार निर्वाचनमा पार्टी विजयी भए शाहलाई प्रधानमन्त्रीको उम्मेदवार बनाउने निर्णय गरिएको थियो । सोही सहमतिअनुसार अहिले शाहले सरकारको नेतृत्व गरिरहेका छन् भने लामिछानेले पार्टीको नेतृत्व सम्हालिरहेका छन् ।