काठमाडौँ । मोरङ जिल्लाको उत्तरपूर्वी भेगमा अवस्थित जेफाले डाँडा हाल पूर्वी नेपालकै एक आकर्षक पर्यटकीय गन्तव्यका रूपमा विकसित हुँदैछ। केराबारी गाउँपालिका–२ मा पर्ने यो डाँडा समुद्री सतहबाट करिब १,९७० मिटरको उचाइमा अवस्थित छ। यसले आगन्तुकहरूलाई हिमाली श्रृङ्खलाको मनोरम दृश्य, प्राकृतिक सौन्दर्य, संस्कृति र स्थानीय जीवनशैली सँगै होम–स्टे पर्यटनको नयाँ स्वाद प्रदान गर्दछ।

जेफाले डाँडाबाट मौसम सफा भएको बेला सगरमाथा, मकालु, कञ्चनजंघालगायतका हिमशृङ्खला अवलोकन गर्न सकिन्छ। साथै, यस ठाउँबाट पूर्वी नेपालको झापा, सुनसरी, इलाम, तेह्रथुम, भोजपुर लगायत १६ जिल्ला र तराईको फाँट स्पष्ट देखिन्छ। यही दृश्यावलोकनको अनुभवलाई थप सजीव बनाउन चारतले भ्यू–टावर निर्माण गरिएको छ, जसबाट पर्यटकहरूले चारैतिरको दृश्य अवलोकन गर्न सक्छन्।

पर्यटन प्रवर्द्धनका लागि यहाँ आठ भन्दा बढि  होम–स्टे सञ्चालनमा छन्, जुन स्थानीय शिक्षक र युवाहरूको नेतृत्वमा सन्चालित छन्। यिनले आगन्तुकहरूलाई रात्रीबास, स्थानीय परिकार, मौलिक नाचगान र पाहुना सत्कारको नमूना प्रस्तुत गर्दै आएका छन्। लगभग १,००० देखि १,५०० रूपैयाँ सम्मको प्याकेजमा यस्ता सेवा पाइन्छन्। यस्तो होम–स्टे व्यवसायले स्थानीय जनतालाई आय–आर्जनको महत्वपूर्ण स्रोत प्रदान गरेको छ ।

धार्मिक तथा सांस्कृतिक हिसाबले पनि जेफाले डाँडा निकै महत्वपूर्ण छ। यहाँ रहेको पाथीभरा मन्दिर, तीनचाने ढुंगा, शिव–पार्वती मन्दिर तथा मंसिर पूर्णिमामा आयोजना हुने मेलाले यस क्षेत्रको सांस्कृतिक पहिचान बोकेका छन्। साथै, जैविक चिया बगान र चिसो हावाले यसलाई अझै रमणीय बनाएको छ।

यद्यपि यहाँसम्म पुग्नको लागि करिब ९५० सीढी चढ्नुपर्ने हुन्छ। खानेपानी, सञ्चार र स्वास्थ्य जस्ता आधारभूत पूर्वाधार अझै कमजोर छन्। तर स्थानीय सरकार र संघीय तहका पर्यटन निकायहरूद्वारा यस क्षेत्रको दिगो विकासका लागि पहल सुरु भइरहेको छ। जेफाले डाँडा केवल एक डाँडा मात्र होइन, यो पूर्वी नेपालको पर्यटन सम्भावनाको झ्याल हो। प्रकृति, संस्कृति, र आतिथ्यको संगम खोज्ने पर्यटकहरूका लागि यो एक अत्यन्त उपयुक्त गन्तव्य बन्नेमा कुनै शंका छैन।