लक्ष्मी सनराइज क्यापिटल लिमिटेड (एलएस क्यापिटल) र नेपाल इन्फ्रास्ट्रक्चर इन्भेस्टमेन्ट फण्ड (एनआईआईएफ) बीच प्रारम्भिक सार्वजनिक निष्कासन (आईपीओ) का लागि परामर्श सेवाहरू प्रदान गर्न सम्झौता भएको छ । लक्ष्मी सनराइज क्यापिटलका प्रमुख कार्यकारी अधिकृत (सीईओ) विजयलाल श्रेष्ठ र नेपाल इन्फ्रास्ट्रक्चर इन्भेस्टमेन्ट फण्डका कार्यकारी अध्यक्ष डा. मनीष थापाबीच सम्झौता भएको हो ।

नेपाल इन्फ्रास्ट्रक्चर इन्भेस्टमेन्ट फण्ड लिमिटेड (एनआईआईएफ) ग्लोबल इक्विटी फण्ड लिमिटेड (जीईएफ) द्वारा स्थापित नेपालको बीमा कम्पनीहरूको स्थायी लगानी वाहन हो ।

यसले कृषि, स्वच्छ ऊर्जा तथा स्वच्छ प्रविधि, पर्यटन, सूचना तथा सञ्चार प्रविधि (आईसीटी), स्वास्थ्य सेवा, र निर्माण क्षेत्रमा केन्द्रित लगानी गर्छ । एनआईआईएफले २०७९ साल कार्तिक २९ मा दर्ता भई २०७९ माघ ५ मा आफ्नो पहिलो लगानी गरेको थियो । यसले १ अर्ब ५० करोड रुपैयाँको अधिकृत पूँजी राखेको छ भने १ अर्ब २० करोड रुपैयाँ जारी पूँजी रहेको छ, जसमा २० प्रतिशत हिस्सा आगामी आईपीओका लागि छुट्याइएको छ ।

लक्ष्मी सनराइज क्यापिटल लिमिटेड (एलएस क्यापिटल) लक्ष्मी सनराइज बैंक लिमिटेडको पूर्ण स्वामित्वमा रहेको सहायक कम्पनी हो । यो लक्ष्मी क्यापिटल र सनराइज क्यापिटलको मर्जरबाट बनेको हो र मर्चेन्ट बैंकिङको क्षेत्रमा बलियो जग राखेको छ। लाइसेन्स प्राप्त मर्चेन्ट बैंकरको रूपमा, एलएस क्यापिटलले मर्चेन्ट र लगानी बैंकिङका विविध सेवाहरू प्रदान गर्छ। ३० वर्षभन्दा बढीको अनुभव रहेको एलएस क्यापिटल नेपालका अग्रणी मर्चेन्ट बैंकहरूमध्ये एक हो, जसले विविध वित्तीय सेवाहरू प्रदान गर्दै आएको छ।