धनगढी ।  काठमाडौंबाट धनगढी उडेका दुई विमान सुर्खेतमा अवतरण गरिएको छ । बाक्लो हुस्सुका कारण भिजिविलिटी कम भएपछि आज बुधबार बिहान काठमाडौंबाट उडेको श्री एयरलाइन्स र बुद्ध एयरको जहाज अवतरण गर्न नसकेपछि डाइभर्ट भएको हो । 

प्रतिकुल मौसमका कारण धनगढी विमानस्थलको हवाइ सेवा प्रभावित भएको छ । 
दुवै विमान सुर्खेत विमानस्थलमा अवतरण गरेका छन् । श्री एयरलाइन्सका स्रोतका अनुसार आज बिहान ९ बजेर ३९ मिनेटमा उडेको जहाजले धनगढीको आकाशमा ४५ मिनेट फन्को हानेको थियो । तर मौसम नखुलेपछि सुर्खेत विमानस्थलमा अवतरण गरिएको स्रोतले जनाएको छ । अब मौसम खुलेपछि मात्र विमान त्यहाँबाट उड्ने भएको छ । 

यस्तै, बुद्ध एयरले पनि प्रतिकुल मौसमका कारण विमान अवतरण हुन नसकेपछि फर्किएको स्रोतले बताएको छ । स्रोतका अनुसार बिहान ९ बजेर ४० मिनेटमा काठमाडौंबाट उडेको जहाज कर्णालीको आकाशबाटै फर्किएर सुर्खेत विमानस्थलतर्फ गएको थियो । सुर्खेत विमानस्थलमा अवतरण गरेको विमान मौसम खुलेपछि मात्र धनगढीका लागि उड्ने बुद्ध एयरले जनाएको छ ।