काठमाडौं । नेकपा एमालेका अध्यक्ष केपी शर्मा ओलीले केन्द्रीय कमिटी बैठक बोलाउन महासचिव शंकर पोखरेललाई निर्देशन दिएका छन् । अध्यक्ष ओलीले भदौ २५, २६ र २७ गते केन्द्रीय कमिटी बैठक बोलाउन सोमबार गुण्डुबाट फोनमार्फत महासचिव पोखरेललाई निर्देशन दिएका हुन् ।

अध्यक्षको निर्देशनपछि महासचिव पोखरेलले बैठकअघि केही आवश्यक प्रक्रिया पूरा गर्नुपर्ने प्रस्ताव गरेका छन् । उनले अध्यक्ष ओलीलाई भेटेर पहिले पार्टी पुनर्गठनका लागि गठन गरिएको कार्यदल र सचिवालयको बैठक बोलाएर त्यसपछि मात्रै केन्द्रीय कमिटी बैठक आयोजना गर्नु उचित हुने बताएका हुन् ।

पार्टी पुनर्गठनका लागि गठित कार्यदलको बैठक बसेपछि सचिवालय बैठक बोलाउनुपर्ने र त्यसपछि केन्द्रीय कमिटी बैठकमा जानुपर्ने प्रस्ताव पोखरेलले अध्यक्ष ओलीसमक्ष राखेका छन् ।