काठमाडौं । भारतमा रहेकी बंगलादेशकी पूर्वप्रधानमन्त्री शेख हसिनाले दिल्लीबाट गरेको भर्चुअल पत्रकार सम्मेलनप्रति बंगलादेश सरकारले कडा आपत्ति जनाएको छ । विदेश मन्त्रालयले विज्ञप्ति जारी गर्दै उक्त कार्यक्रमले बंगलादेशको सार्वभौमिकता, राज्य र जनताको अपमान गरेको आरोप लगाएको हो ।

झन्डै दुई वर्षपछि पहिलोपटक सञ्चारमाध्यमसँग प्रत्यक्ष संवाद गर्दै हसिनाले डिसेम्बरसम्म स्वदेश फर्किने योजना रहेको बताएकी थिइन् । तर फर्किने मिति भने सार्वजनिक गरेकी छैनन् ।

बंगलादेशले सन् २०१३ को प्रत्यर्पण सन्धिअनुसार शेख हसिनालाई फिर्ता पठाउन गरिएको अनुरोधमा भारतले अहिलेसम्म कुनै प्रतिक्रिया नदिएको भन्दै असन्तुष्टि पनि जनाएको छ ।

यसबीच, पत्रकार सम्मेलनमा सहभागी भएका पूर्वकप्तान शाकिब अल हसनको घरमा पेट्रोल बम आक्रमण भएको दाबी अवामी लिगले गरेको छ । साथै, हसिनासम्बन्धी समाचार प्रकाशन गरे सञ्चारमाध्यममाथि कारबाही गर्ने चेतावनी दिइएको आरोप पनि लगाइएको छ ।

भारतले भने उक्त पत्रकार सम्मेलन निजी संस्थाले आयोजना गरेको र यसमा भारत सरकारको कुनै संलग्नता वा समर्थन नरहेको स्पष्ट पारेको छ ।

सन् २०२४ अगस्टमा सत्ता गुमाएपछि भारतमा रहेकी शेख हसिनाविरुद्ध बंगलादेशमा मानवताविरुद्धको अपराधसम्बन्धी मुद्दा चलिरहेको छ । अन्तरिम सरकारले अवामी लिगमाथि प्रतिबन्ध लगाएको छ भने अदालतले हसिनाका अभिव्यक्ति सञ्चारमाध्यम र सामाजिक सञ्जालमा प्रसारण गर्न पनि रोक लगाएको छ ।