जनकपुरधाम । धनुषा जिल्ला प्रशासन कार्यालयको अगुवाइमा शनिबार जनकपुरधाममा सद्भाव र्‍याली आयोजना गरिएको छ । सामाजिक सद्भाव, एकता र शान्तिको सन्देश प्रवाह गर्ने उद्देश्यले आयोजित र्‍यालीमा विभिन्न समुदाय तथा धर्मका नागरिकको सहभागिता रहेको थियो ।

र्‍यालीका सहभागीले ‘नेपाली एकता जिन्दावाद’, ‘हामी सबै एक हौँ’ लगायतका नारा लगाएका थिए । र्‍याली रेलवे स्टेशनबाट सुरु भई भानु चोक, जनक चोक र सोनारपट्टी हुँदै पुनः जनक चोकमा पुगेर कोणसभामा परिणत भएको थियो ।

कार्यक्रममा धनुषा निर्वाचन क्षेत्र नम्बर–३ का प्रतिनिधिसभा सदस्य मनिष झा, धनुषा–२ का प्रतिनिधिसभा सदस्य रामविनोद यादव, जनकपुरधाम उपमहानगरपालिकाका प्रमुख मनोज साहलगायत जनप्रतिनिधि तथा स्थानीयवासी सहभागी भएका थिए ।

यसअघि बिहीबार जनकपुरधाममा भएको प्रदर्शनका क्रममा हिंसा भड्किन सक्ने आकलन गर्दै जिल्ला प्रशासन कार्यालयले कर्फ्यु आदेश जारी गरेको थियो । सो प्रदर्शनका क्रममा एक बालक घाइते भएका थिए । त्यसपछिको अवस्थालाई मध्यनजर गर्दै शान्ति, सद्भाव र सामाजिक एकताको सन्देश दिन शनिबार सद्भाव र्‍याली आयोजना गरिएको प्रशासनले जनाएको छ ।