काठमाडौँ । नेपाल कम्युनिस्ट पार्टी (नेकपा) ले सुदूरपश्चिम र कर्णाली प्रदेश सरकारको नेतृत्व गर्ने भएको छ । शनिबार नेकपा र नेकपा (एमाले)बीच भएको सहमतिअनुसार दुवै प्रदेशमा नेकपाले सरकारको नेतृत्व गर्ने समझदारी बनेको हो ।

सहमतिअनुसार सुदूरपश्चिममा नेकपा संसदीय दलका नेता खगराज भट्ट र कर्णालीमा मंगलबहादुर शाही मुख्यमन्त्री बन्ने भएका छन् । उनीहरूको नेतृत्वमा नयाँ सरकार गठनको प्रक्रिया संवैधानिक व्यवस्थाअनुसार अघि बढाइने बताइएको छ ।

हाल सुदूरपश्चिम प्रदेश सरकारको नेतृत्व नेपाली कांग्रेस संसदीय दलका नेता कमलबहादुर शाहले गरिरहेका छन् । दुई दलबीच सत्ता साझेदारी, मन्त्रालय बाँडफाँट र साझा कार्यक्रमका विषयमा सहमति जुटेसँगै दुवै प्रदेशमा नयाँ सरकार गठनको बाटो खुलेको हो ।

यसैबीच, कर्णाली प्रदेशका मुख्यमन्त्री यामलाल कँडेलले शनिबार पदबाट राजीनामा दिएका छन् । प्रदेशसभाको बैठकलाई सम्बोधन गर्दै उनले राजीनामाको घोषणा गरेका हुन् ।

मुख्यमन्त्री कँडेलविरुद्ध नेपाली कांग्रेस र नेकपाले अविश्वासको प्रस्ताव दर्ता गराएका थिए ।