काठमाडौं । काठमाडौंको बौद्धमा एक महिलाले आत्मदाहको प्रयास गर्दा गम्भीर घाइते भएकी छन् । घटनामा उनको शरीरको करिब ५० प्रतिशत भाग जलेको प्रहरीले जनाएको छ ।

काभ्रेको तेमाल स्थायी घर भई बौद्धमा बस्दै आएकी २७ वर्षीया सालु गुरुङले सोमबार साँझ पौने ४ बजे बौद्ध गेटअगाडि आत्मदाहको प्रयास गरेकी हुन् ।

जिल्ला प्रहरी परिसर काठमाडौंका प्रवक्ता प्रहरी उपरीक्षक पवनकुमार भट्टराईका अनुसार घटनालगत्तै गुरुङलाई गोकर्णेश्वर–६ स्थित सुष्मा कोइराला मेमोरियल अस्पताल लगिएको थियो । अवस्था गम्भीर भएपछि उनलाई थप उपचारका लागि कीर्तिपुरस्थित बर्न अस्पतालमा रेफर गरिएको छ ।

विवाहित गुरुङले बौद्ध क्षेत्रमा खाजाघर सञ्चालन गर्दै आएकी थिइन् । उनले आत्मदाहको प्रयास गर्नुको कारण भने हालसम्म खुल्न नसकेको प्रहरीले जनाएको छ ।