जनकपुरधाम । समयमै पर्याप्त वर्षा नहुँदा यस वर्ष असार मसान्तसम्म मधेस प्रदेशमा करिब ५८ प्रतिशत क्षेत्रफलमा मात्रै धान रोपाइँ सम्पन्न भएको छ ।मधेस प्रदेश कृषि विकास निर्देशनालय, धनुषाका अनुसार प्रदेशको कुल धान खेतीयोग्य क्षेत्रफलमध्ये ५७.९३ प्रतिशतमा रोपाइँ सकिएको हो । 

जिल्लागत रूपमा सिरहामा सबैभन्दा बढी ८० प्रतिशत क्षेत्रमा धान रोपिएको छ भने महोत्तरीमा सबैभन्दा कम ३९.५९ प्रतिशत क्षेत्रफलमा मात्रै रोपाइँ भएको बागवानी विकास अधिकृत किरण विश्वकर्माले जानकारी दिए ।

निर्देशनालयका अनुसार सप्तरीमा ६८ हजार हेक्टरमध्ये करिब ३४ हजार हेक्टर, सिरहामा ५४ हजार हेक्टरमध्ये ४३ हजार २०० हेक्टर, धनुषामा ४३ हजार ७०० हेक्टरमध्ये २१ हजार ८५० हेक्टर तथा महोत्तरीमा ४० हजार हेक्टरमध्ये १५ हजार ८३८ हेक्टर क्षेत्रमा धान रोपाइँ सम्पन्न भएको छ ।

यस्तै, सर्लाहीमा ४२ हजार ६९५ हेक्टरमध्ये २५ हजार ६१९ हेक्टर, रौतहटमा ३८ हजार ५०० हेक्टरमध्ये २१ हजार १७५ हेक्टर, बारामा ४५ हजार १०० हेक्टरमध्ये २४ हजार ८०५ हेक्टर तथा पर्सामा ५३ हजार ९३८ हेक्टरमध्ये करिब ३५ हजार ६० हेक्टर क्षेत्रमा धान रोपिएको तथ्यांकमा उल्लेख छ ।

कृषि प्राविधिकहरूका अनुसार असारभित्र रोपाइँ सम्पन्न हुँदा उत्पादनमा सकारात्मक प्रभाव पर्ने अपेक्षा गरिन्छ । पछिल्लो समय पर्याप्त वर्षा भएपछि खेत तयारी, बेर्ना उखेल्ने र रोपाइँको काम प्रदेशभर तीव्र रूपमा अघि बढिरहेको छ ।

यस वर्ष किसानहरूले उन्नत जातका धानका बीउ प्रयोग गर्नुका साथै रासायनिक र प्राङ्गारिक मलको सन्तुलित प्रयोगमा पनि ध्यान दिएका छन् । तर केही स्थानमा मलको अभाव र सिँचाइ पूर्वाधारको कमी अझै चुनौतीकै रूपमा रहेको किसानहरूले बताएका छन् ।