काठमाडौं । देशका विभिन्न २४ जिल्लाका साना नदी तथा खोलामा आज पानीको बहाव उल्लेख्य रूपमा बढ्ने र आकस्मिक बाढी आउने मध्यम जोखिम रहेको भन्दै जल तथा मौसम विज्ञान विभागले सतर्क रहन आग्रह गरेको छ ।

बाढी पूर्वानुमान महाशाखाका अनुसार ताप्लेजुङ, सोलुखुम्बु, सङ्खुवासभा, दोलखा, सिन्धुपाल्चोक, काभ्रेपलाञ्चोक, काठमाडौं, भक्तपुर, ललितपुर, मकवानपुर, चितवन, पाल्पा, कास्की, तनहुँ, स्याङ्जा, पर्वत, बागलुङ, म्याग्दी, मुस्ताङ, रुकुम पश्चिम, डोटी, बझाङ, कैलाली र कञ्चनपुरलगायत जिल्लाबाट बग्ने साना नदी तथा खोलामा बहाव बढ्ने सम्भावना रहेको जनाएको हो ।

महाशाखाका बाढीविद् विनोद पराजुलीले नदी किनार तथा तटीय क्षेत्रमा बसोबास गर्ने नागरिक, सडक प्रयोगकर्ता र निर्माण कार्यमा संलग्न व्यक्तिलाई विशेष सतर्कता अपनाउन आग्रह गरेका छन् । उनका अनुसार ती क्षेत्रमा आकस्मिक बाढीको मध्यम जोखिम रहेकाले जोखिमयुक्त स्थानमा अनावश्यक आवतजावत नगर्नु उपयुक्त हुनेछ ।

निरन्तर वर्षाका कारण पहाडी तथा हिमाली क्षेत्रमा नदी–नालाको बहाव बढ्ने भएकाले डुबान र पहिरोको सम्भावना भएका क्षेत्रका स्थानीयलाई पनि आवश्यक सावधानी अपनाउन विभागले सुझाव दिएको छ ।

विभागका अनुसार मनसुनी गतिविधि सक्रिय रहेकाले हिमाली र पहाडी भूभागका साथै कोशी, बागमती, लुम्बिनी र सुदूरपश्चिम प्रदेशका तराईका केही स्थान तथा मधेस, बागमती र गण्डकी प्रदेशका तराईका एक–दुई स्थानमा भारीदेखि धेरै भारी वर्षा हुन सक्ने अनुमान गरिएको छ ।

मौसमविद् डेविट ढकालका अनुसार कोशी, गण्डकी, लुम्बिनी र सुदूरपश्चिम प्रदेशका पहाडी तथा तराईका केही क्षेत्रमा अति भारी वर्षा हुने सम्भावना रहेकाले उच्च सतर्कता अपनाउन आवश्यक छ ।