काठमाडौं । बिहीबार दिउँसो परेको वर्षापछि काठमाडौंका विभिन्न मुख्य सडक जलमग्न भएका छन् । पानी जमेपछि सवारी आवागमन प्रभावित हुनुका साथै पैदलयात्रीले समेत सास्ती बेहोर्नुपरेको छ ।

विशेषगरी माइतीघर क्षेत्रमा सडक पूर्ण रूपमा डुबानमा परेपछि त्यहाँको यातायात केही समय अस्तव्यस्त बनेको थियो । त्यस्तै पुतलीसडक, धोबीखोला करिडोरलगायतका विभिन्न स्थानमा पनि पानी जम्दा आवागमनमा कठिनाइ भएको छ ।

सडकमा पानी भरिएपछि सवारी साधनको गति सुस्त बनेको थियो भने पैदल हिँड्ने सर्वसाधारणले समेत यात्रा गर्न समस्या भोग्नुपरेको देखिएको छ ।

काठमाडौंमा केहीबेरको वर्षामै सडक डुबान हुने समस्या दोहोरिँदै आएको छ । अपर्याप्त ढल निकास र वर्षाको पानी व्यवस्थापन प्रभावकारी नहुँदा सामान्य वर्षापछि पनि मुख्य सडकहरू जलमग्न हुने अवस्था देखिने गरेको छ ।