काठमाडौं । समाचार संकलन र प्रकाशन तथा प्रशारणमा अवरोध हुने गरी मिडिया हाउसको प्रवेशद्धार अगाडी एकै पटक निजी सवारीसाधन पार्किङ गरिएको घटनाप्रति नेपाल मिडिया सोसाइटीले गम्भीर ध्यानाकर्षण भएको जनाएको छ । सोमबार एक विज्ञप्ति जारी गर्दै सोसाइटीले आपत्ति जनाएको हो । 

आज विहान ७ बजे एकैपटक काठमाडौंको तिनकुने स्थित कान्तिपुर दैनिक तथा कान्तिपुर टेलिभिजन, नयाँ बानेश्वर स्थित अनलाइन खबर र मध्यवानेश्वर स्थित हिमालय टेलिभिजनको कार्यालय प्रवेशद्धार अगाडी आवागमन अवरुद्ध हुनेगरी रहस्यमय तरिकाले निजी सवारी साधन पार्किङ गरेको पाइएपछि दिनभर जसो यस कार्यको चर्चा भएको छ । 

यस प्रकरणमा विभिन्न राजनीतिक दल तथा नेपाल पत्रकार महासंघ लगायतले गम्भीर ध्यानाकर्षण भएको जनाएका छन् । यसै सन्दर्भमा सोसाइटीले पनि जनताको सुसुचित हुने संवैधानिक अधिकारलाई कुण्ठित गर्ने  यस्तो गतिविधिको अनुसन्धान गरी दोषीमाथि हदैसम्मको कारवाही गर्न माग गरेको छ । साथै मिडिया हाउसलाई  आतंकित पार्ने यस्ता गतिविधि नदोहोर्‍याउन पनि चेतावनी दिएको छ ।