पोखरा । विद्यार्थीहरूको शैक्षिक गुणस्तर अभिवृद्धि गर्ने उद्देश्यका साथ सञ्चालन हुँदै आएको लिफ ट्युसन सेन्टरले आफ्नो स्थापना भएको एक वर्ष पूरा गरेको अवसरमा शनिबार प्रथम वार्षिकोत्सव मनाएको छ । वार्षिकोत्सवकै अवसर पारेर सेन्टरले पोखरा महानगरपालिका– २८ सिसुवा चोकमा नयाँ शाखा उद्घाटन गरेको हो ।

यसअघि लेखनाथस्थित पावरहाउस, तल्लो गोगन गौँडाबाट सञ्चालन हुँदै आएको सेन्टर अब सिसुवा चोकबाट समेत सञ्चालन हुने भएको छ । नयाँ शाखाको उद्घाटनसँगै थप विद्यार्थीलाई सहज र गुणस्तरीय शैक्षिक सेवा प्रदान गर्ने लक्ष्य लिइएको सञ्चालक पक्षले जनाएको छ ।

सेन्टरका सञ्चालक अजय घिमिरेले विद्यार्थीलाई केवल पाठ्यपुस्तकमा सीमित नराखी व्यवहारिक ज्ञान, अनुशासन र आत्मविश्वास विकासमा समेत जोड दिँदै आएको बताए । उनले व्यस्त अभिभावक तथा गृहकार्यमा सहजीकरण गर्न नसक्ने परिवारका बालबालिकालाई सहयोग पुगोस् भन्ने उद्देश्यले लिफ ट्युसन सेन्टर स्थापना गरिएको उल्लेख गरे ।

“धेरै अभिभावक कामको व्यस्तताका कारण बच्चालाई पर्याप्त समय दिन सक्नुहुन्न । कतिपयले गृहकार्यमा सहयोग गर्न पनि सक्नुहुन्न । त्यस्ता विद्यार्थीलाई सहज वातावरणमा गुणस्तरीय शिक्षा दिनका लागि यो सेन्टर सुरु गरिएको हो,” उनले भने ।

हाल सेन्टरले कक्षा १ देखि १२ सम्मका विद्यार्थीलाई लक्षित गर्दै विज्ञान, गणित, अंग्रेजी तथा व्यवस्थापन विषयमा विशेष कक्षा सञ्चालन गर्दै आएको छ । साथै एसईई तथा ं२ तयारी कक्षालाई प्राथमिकतामा राखी नियमित मोडेल टेस्ट, करिअर परामर्श तथा अभिमुखीकरण कार्यक्रमसमेत सञ्चालन भइरहेको जनाएको छ ।

विद्यार्थीमैत्री वातावरण, सुलभ शुल्क र अनुभवी शिक्षकमार्फत गुणस्तरीय शिक्षण प्रदान गरिएकाले पछिल्लो समय अभिभावक तथा विद्यार्थीको आकर्षण बढ्दै गएको सेन्टरले जनाएको छ । उत्कृष्ट नतिजाका कारण स्थानीय स्तरमा सेन्टरप्रति विश्वाससमेत बढ्दो क्रममा रहेको बताइएको छ ।

उद्घाटन तथा वार्षिकोत्सव कार्यक्रममा सेन्टरमा अध्ययन गरेका पूर्वविद्यार्थी, हाल अध्ययनरत विद्यार्थी, शिक्षक तथा अभिभावकहरूको उल्लेख्य सहभागिता रहेको थियो । कार्यक्रममा विद्यार्थीहरूले सांस्कृतिक प्रस्तुति समेत दिएका थिए ।