ठाकुरप्रसाद आचार्य 

म्याग्दी -    मुस्ताङको लोमान्थाङ गाउँपालिका ५ स्थित ल्वाथाङमा तेस्रो संस्करणको गल्फ कोर्स प्रतियोगिता शनिबार सम्पन्न भएको छ । प्रतियोगितामा आयोजक समेत रहेका इन्द्रधारा विष्टले टप अफ दि वल्ड गल्फ क्लासिकको उपाधि जितेका छन  । स्टेवल फोर्ड फूल हण्डिक्यापको र्फम्याट खेलाइएको ९ होलको खेलमा विष्टले ३ हन्डर हान्दै २१ स्कोर जितेको थियो । ३ वटा होलमा पार,एउटामा त्रिपल बुगी र ५ वटा होलमा बुगी खेल्दै विष्टले उपाधि हासिल हासिल गरे । प्रतियोगितामा नेपाल गल्फ एसोसिएनका उपाध्यक्ष समेत रहेका फुर्साङ लामा दोस्रो भएका छन । उनले ५ वटा होलमा पार,एउटामा डबल बुगी र बाँकी ३ वटामा बुगी हिर्काउदै २ अन्डर २० को स्कोर प्राप्त गरेका छन  । पुरुष तर्फको ग्रस उपाधि गैरआवासीय नेपाल संघ अमेरिकाबाट प्रतिनिधित्व गरेका निर्मल श्रेष्ठले हात पारेका छन । उनले १४ स्कोर सहित ग्रस उपाधि हासिल गरेका छन । 

श्रेष्ठले तेस्रो होलको पार थ्रि,मा बर्डी हिर्काएका छन  भने ४ वटा होलमा पार,एउटा होलमा डवल बुगी र बाँकी ३ होलमा बुगी हिर्काएको प्रतियोगिताका सदस्य भुवन गुरुङले जानकारी दिएका छन । यसैगरी, महिला तर्फ पोखराकी बालकाशी गुरुङले उपाधि जितेकी छन । उनले ५ अन्डर २३ को स्कोर प्राप्त गरे। प्रतियोगितामा धरानकी झुना राई दोस्रो भएकी छन । विजेता खेलाडीहरुलाई लोमान्थाङ गाउँपालिकाका अध्यक्ष टसी न्हर्वु गुरुङले पुरस्कार र ट्रफी वितरण गरेका छन  ।

 समुद्री सतह देखि चार हजार ६ सय ४५ मिटरको उचाईमा गल्फ प्रतियोगिता गरिएको आयोजकले जनाएका छन् । लोमान्थाङको पर्यटन प्रर्वद्धनका लागि विश्वकै उच्च स्थानमा गल्फ प्रतियोगिता आयोजना गरिएको हो ।  प्रतियोगितामा  होल नम्बर ३ मा होल इन वन गर्ने खेलाडीलाई याक प्रदान गर्ने भनिएपनि कसैले जित हासिल गर्न सकेनन् । विश्वकै उच्चतम गल्फ कोर्समार्फत लोमान्थाङको पर्यटन प्रर्वद्धन गर्नु मुख्य उद्देश्य भएको मुस्ताङ गल्फ कोर्सका व्यवस्थापक  विष्टले बताउछन । 

आगामी दिनहरुमा मुस्ताङ गल्फ कोर्सलाई विश्वको उच्चतम उचाइमा रहेको गल्फ कोर्सको रुपमा प्रचार गर्न समेत यसपटको प्रतियोगिताले सहयोग पुगेको उनले विश्वास व्यक्त गरे । प्रतियोगितालाई आगमी दिनमा पनि निरन्तरता दिने उनले बताएका छन  । प्रतियोगिताका वारेमा संसारभर प्रचारप्रसार गरेर विदेशी खेलाडीहरुलाई पनि आर्र्कषित गर्ने योजना रहेको उनलेले सुनाउछन । गल्फ प्रतियोगितामा आएका खेलाडी र पर्यटकहरुलाई लोमान्थाङमा स्वागत गर्न पाउँदा खुसी गाउँपालिका अध्यक्ष टसी न्हर्वु गुरुङले बताउछन । गल्फ प्रतियोगिताले पर्यटन प्रर्वद्धन ठूला टेवा पुगेको उनले आशा व्यक्त गरेका छन । 

                                                                                                                                स्रोत: गोरखापत्र अनलाइन