काठमाडौँ । गायिका एवम् मोडल सुम्निमाले खुसी र उदासी दुवैखाले रङ र स्वादको सम्मिश्रण रहेको पप–रक शैलीको म्युजिक भिडिओ ‘झरी’ सार्वजनिक गरेकी छन् । क. तमोटका शब्दलाई भावपूर्ण संगीत र अभिनयद्वारा सिँगारिएको भिडियोमा मूल रूपमा विषाद, रोमान्स र आशा जस्ता मनोदशा देखाइएको छ । 

सो सांगीतिक श्रव्यदृश्य सामग्रीमा एक जोडी युवकयुवती एकार्कालाई साँचो माया गर्छ ।  उमेर उस्तै भए पनि भावनात्मक रूपमा युवक पाको, स्थिर र गहिरो छ भने युवती अलि आलोकाँचो ।  
 

केटो मायाको अर्थ आफैँलाई असल बनाउनु हो भनेर सम्झाउँछ तर त्यसलाई केटीले आत्मसात् गर्न नसक्दा ‘ब्रेकअप’ हुन्छ । उनलाई पछि मात्र महसुस हुन्छ-  माया कुनै परीकथा होइन, पप्पी–लभ पनि होइन बरु यसमा इमानदारी जरुरी हुन्छ ।

साउने झरीमा पाँच–छ घन्टा रुझेर भिडिओ बनाइएको सुम्निमाले बताइन् । ‘घरभित्र बसी झ्यालबाहिर यसो हात निकालेर मात्र झरीको मर्म बुझाउन सकिँदैन,’  उनले भनिन्, ‘यस  म्युजिक भिडियोमा मैले वर्षामा सर्वांग भिजेर, मेकअप बिर्सेर कलात्मक प्रस्तुति दिने कोसिस गरेकी छ ।’ बर्सेको पानीमा ‘एंगल’ र ‘लाइट’ मिलाउन भने मुस्किल परेको उनको अनुभव छ ।