काठमाडौँ । व्यवसायी करण चौधरीले नाडाको अध्यक्षमा आफ्नो उम्मेदवारी घोषणा गरेका छन् । अटो व्यवसायीहरुको छाता संस्था नाडा अटोमोबाइल्स एसोसिएसन अफ नेपालको भावी नेतृत्वका लागि व्यवसायी चौधरीले अध्यक्षमा आफ्नो उम्मेदवारी घोषणा गरेका हुन् । 

अटोमोबाइल व्यवसायीहरुको ५ दशक पुरानो छाता संगठन नाडाको ४७ औं वार्षिक साधारण सभा सहितको अधिवेशन आउँदो पुस २० र २१ गते काठमाडौँमा हुँदैछ । 

व्यवसायी चौधरीले सीजी होल्डिङ्सका तर्फबाट आफ्नो उम्मेदवारीको घोषणा गरेका हुन् । त्यसो त यसअघिको निर्वाचनमा चौधरी नाडाको वर्तमान अध्यक्ष ध्रुव थापासँग पराजय व्यहोरेका थिए ।

नाडाको आसन्न निर्वाचनमा सहमतिको सम्भावना कम देखिएकाले आफूले पुनः अध्यक्षमा उम्मेदवारी दिने निर्णय गरेको बताएका छन् । धेरै अटोमोबाइल व्यवसायीहरुको आफूलाई साथ र सर्पोट रहेको समेत चौधरीले दाबी गरेका छन् । 

यता नाडाको चुनावी सर्गमी बढेसँगै अर्का व्यवसायी प्रकाश कपुरीले यसअघि नै अध्यक्षमा उम्मेदवारी दिने घोषणा गरिसकेका छन् । 

यस्तै, कपुरी र चौधरीसँग भिड्न गोल्छा अर्गनाइजेशनबाट जिओ अटोमोबाइल्सका प्रबन्ध निर्देशक आकाश गोल्छाले समेत अध्यक्षमा उम्मेदवारी दिने तयारी गरिरहेका छन् । 

फोर्स गाडीको बिक्रेता रहेका गोल्छालाई नाडाका वर्तमान अध्यक्ष ध्रुव थापाको समेत समर्थन रहेको बुझिएको छ ।