काठमाडौं । शौर्य सिमेन्टले आफ्नो क्लिंकर (अर्धप्रशोधित सिमेन्ट) उत्पादनलाई छिमेकी राष्ट्र भारततर्फ निर्यात गर्न सुरुवात गरेको छ । उद्योगले १६ मंसिरदेखि क्लिंकर निर्यात सुरु गरेको हो । 

शौर्य सिमेन्टका प्लान्ट हेड गुरुदयाल सिंह तथा सहायक महाप्रबन्धक विकास खड्काले रिबन काटेर निर्यातको सुरुवात गरेका हुन् । 

उदयपुरको चुनढुंगाबाट उत्पादन गरिएको यस क्लिंकरमा उच्चस्तरीय चुनढुंगा समिश्रण रहेकाले भारतमा अवस्थित सिमेन्ट उद्योगमा सफल परीक्षणबाट स्वीकृति भई निर्यात गर्न सफल भएको कम्पनीले जनाएको छ । 

व्यावसायिक घराना शंकर ग्रुप, गोल्छा ग्रुप तथा अम्बे ग्रुपको संयुक्त लगानीमा कम्पनी खोलिएको हो । 

०७८ माघबाट उत्पादन थालेको उद्योगको दैनिक उत्पादन क्षमता ३ हजार टन रहेको छ । अहिले उद्योगले ५३ र ४३ ग्रेडमा ओपिसी तथा पिपिसी सिमेन्ट उत्पादन गर्दै आएको छ ।