लाङटाङ पदमार्गमा एक नेपाली पथ प्रदर्शकको मृत्यु छ ।

मृत्यु हुनेमा धादिङको धुनीवेशी नगरपालिका-९ का ५० वर्षीय कुमार पाण्डे छन् ।

उनी शनिबार बिहान ११ बजे गोसाइकुण्ड गाउँपालिका-४  स्थित लामा तिबेतियन होटलको कोठामा मृत फेला परेको जिल्ला प्रहरी कार्यालय रसुवाका सूचना अधिकारी इन्स्पेक्टर नेत्रप्रसाद पौडेलले जानकारी दिए ।

पाण्डे स्वीट्जरल्याण्डबाट आएकी अन्दाजी ७०/७५ वर्षीया वृद्ध महिलालाई लाङटाङ उपत्यका घुमाएर शुक्रबार राति उक्त होटलमा बास बसेका थिए ।

इन्स्पेक्टर पौडेलका अनुसार लाङटाङ उपत्यका पुगेर फर्किँदा पाण्डे सामान्य बिरामी परेका थिए । भोलिपल्ट सुतेको स्थानमा मृत भेटिएका उनले बताए ।

प्रहरीको प्रारम्भिक अनुसन्धानमा पाण्डे लामो समयदेखि पथप्रदर्शकको काम गर्दै आएका थिए । स्वीट्जरल्याण्डकी ती महिलासँग उनको लामो समयदेखिको चिनजान रहेको र हरेक पटक नेपाल आउँदा पाण्डेले नै ती महिलालाई पाण्डेले नै घुमाउँथे ।

मृतक पाण्डेको शव पोष्टमर्टमका लागि धुन्चेस्थित जिल्ला अस्पताल लगिएको र घटनाबारे थप अनुसन्धान भइरहेको इन्स्पेक्टर पौडेलले जानकारी दिए ।