काठमाडौं । नेपाली कांग्रेसले आगामी साउन २४ गते (आइतबार) केन्द्रीय कार्यसमितिको बैठक बोलाएको छ । पार्टीभित्र महाधिवेशनको तयारी, विधानको कार्यान्वयन तथा आन्तरिक व्यवस्थापनका विषयमा मतभेद देखिएको अवस्थामा बैठक आह्वान गरिएको हो ।

पार्टीका कार्यवाहक मुख्य सचिव कृष्णप्रसाद दुलालले जारी गरेको सूचनाअनुसार बैठक दिउँसो १ बजे ललितपुरस्थित पार्टीको केन्द्रीय कार्यालयमा बस्नेछ । बैठकमा सबै केन्द्रीय पदाधिकारी र केन्द्रीय सदस्यलाई अनिवार्य उपस्थितिका लागि अनुरोध गरिएको छ ।

बैठकमा विशेषगरी इतर समूहले घोषणा गरेको राष्ट्रिय भेला तथा पार्टीको १५औँ महाधिवेशनसँग सम्बन्धित विषयमा विस्तृत छलफल हुने जनाइएको छ ।

इतर समूहले साउन २९ देखि ३१ गतेसम्म राष्ट्रिय भेला आयोजना गर्ने निर्णय गरेको छ । उक्त भेलाको संयोजकको जिम्मेवारी पूर्वमहामन्त्री डा. शशांक कोइरालालाई दिइएको छ ।

यता, संस्थापन पक्षले असोज १६ देखि १९ गतेसम्म १५औँ महाधिवेशन सम्पन्न गर्ने मिति सार्वजनिक गरिसकेको छ ।

बैठकमा महाधिवेशनको कार्यतालिका र सुनिश्चितता, क्रियाशील सदस्यताको नवीकरण तथा अद्यावधिक, विधानको अक्षरशः पालना गर्ने वा आवश्यक व्यवस्थाका लागि बाधा–अड्काउ फुकाउने विषय, साथै पार्टीभित्र नेताहरूको जिम्मेवारी र व्यवस्थापनका मुद्दामा केन्द्रित भएर छलफल हुने अपेक्षा गरिएको छ ।