काठमाडौं । आज राजधानी काठमाडौं उपत्यकासहित देशका ३५ जिल्लाका खोला तथा नदीमा जलसतह बढ्ने र आकस्मिक बाढी आउने सम्भावना रहेकाले जोखिम क्षेत्रमा बसोबास गर्ने नागरिकलाई उच्च सतर्कता अपनाउन आग्रह गरिएको छ ।

बाढी पूर्वानुमान महाशाखाका अनुसार काठमाडौं, भक्तपुर, ललितपुर, काभ्रेपलाञ्चोक तथा आसपासका जिल्लाका साना नदी र खोलामा आकस्मिक बाढीको उच्च जोखिम देखिएको छ । यी क्षेत्रमा वर्षासँगै नदीको बहाव तीव्र रूपमा बढ्न सक्ने भएकाले नदी किनार, तटीय बस्ती तथा होचा स्थानमा बसोबास गर्ने नागरिकलाई विशेष सावधानी अपनाउन अनुरोध गरिएको छ ।

त्यसैगरी पाँचथर, इलाम, झापा, मोरङ, सुनसरी, सप्तरी, भोजपुर, संखुवासभा, दोलखा, रामेछाप, सिन्धुली, सिन्धुपाल्चोक, रसुवा, नुवाकोट, धादिङ, गोरखा, लमजुङ, तनहुँ, मकवानपुर, बारा, पर्सा, रौतहट, चितवन, नवलपरासी पूर्व, नवलपरासी पश्चिम, पाल्पा, कास्की, पर्वत, म्याग्दी, स्याङ्जा, कैलाली लगायत आसपासका जिल्लाबाट बग्ने ससाना नदी तथा खोलामा पानीको बहाव उल्लेख्य बढ्ने र आकस्मिक बाढीको मध्यम जोखिम रहने पूर्वानुमान गरिएको छ ।

महाशाखाले नदी किनार, पुल, तटीय क्षेत्र तथा बाढी प्रभावित हुन सक्ने स्थानमा अनावश्यक आवतजावत नगर्न, मौसम तथा बाढीसम्बन्धी आधिकारिक सूचना नियमित रूपमा पालना गर्न र आवश्यक सतर्कता अपनाउन सर्वसाधारणलाई आग्रह गरेको छ ।