काठमाडौँ । प्रतिनिधि सभाको बैठक ६ दिनका लागि स्थगित गरिएको छ । शुक्रबार सभामुख डोलप्रसाद अर्यालले संसद्को अर्को बैठक आगामी असार ११ गते बस्ने जानकारी गराएका हुन् ।

हाल सरकारको नेतृत्व गरिरहेको दल राष्ट्रिय स्वतन्त्र पार्टी (रास्वपा) को प्रथम महाधिवेशन असार ७ गतेदेखि चितवनमा आयोजना हुँदैछ । महाधिवेशनमा सहभागी हुन पार्टीका सांसदहरू चितवन जाने भएकाले प्रतिनिधि सभा बैठक स्थगित गरिएको जनाइएको छ ।

प्रतिनिधि सभामा रास्वपाको झण्डै दुई तिहाइको संख्यामा सांसद रहेका छन् । पार्टीको प्रमुख राजनीतिक कार्यक्रमसँग सांसदहरूको सहभागिता जोडिएकाले संसद् बैठकलाई केही दिनपछि सारिएको हो ।

संघीय संसदको माथिल्लो सदन राष्ट्रिय सभामा भने राष्ट्रिय स्वतन्त्र पार्टीको प्रतिनिधित्व रहेको छैन ।