काठमाडौं । आगामी हप्ता सातामै लगातार चार दिन सार्वजनिक बिदा पर्ने भएको छ । सरकारले जेठ १४ गते बिहीबारका दिन बकर इदको अवसरमा सार्वजनिक बिदा दिने निर्णय गरेसँगै लगातार चार दिन बिदा पर्ने भएको हो ।  

संघीय सरकारको गृहमन्त्रालयले शुक्रबार जारी गरेको विज्ञप्तिमा इस्लाम धर्मावलम्बीहरुको पर्व बकर इद (इद–उल–अज्हा) अवसरमा सार्वजनिक बिदा दिने निर्णय गरेको उल्लेख छ । 

गृहका प्रवक्ता आनन्द काफ्लेले जारी गरेको विज्ञप्तिमा भनिएको छ, ‘मुस्लिम आयोगबाट मिति २०८३ जेठ १४ गते बिहीबारका दिन बकर इद परेको बेहोरा जानकारी प्राप्त हुन आएको हुँदा मिति २०८३ जेठ १४ गते सार्वजनिक बिदा हुने भएको बेहोरा सम्बन्धित सबैको जानकारीका लागि अनुरोध छ ।’

गृहले बकर इदको अवसरमा सम्पूर्ण इस्लाम धर्मावलम्बीलाई शुझकामना पनि दिएको छ ।  बकर इदमा सार्वजनिक बिदा भएसँगै अर्को साता लगातार चार दिन सार्वजनिक बिदा पर्ने भएको छ । जेठ १५ गते गणतन्त्र दिवसका अवसरमा सार्वजनिक बिदा हुँदै आएको छ । 

त्यसको भोलिपल्ट जेठ १६ गते शनिबार र जेठ १७ गते आइतबार साप्ताहिक बिदा नै रहेको छ ।