काठमाडौं । कायम मुकायम प्रधानन्यायाधीश सपना मल्ल प्रधानले न्यायालयमा निरंकुशता हावी हुने संकेत देखिएको दाबी गरेकी छिन् । शनिबार कानुन दिवसको अवसरमा आयोजित कार्यक्रमलाई सम्बोधन गर्दै उनले यस्तो बताएकी हुन् ।

विधि र वैधानिक परम्पराको हत्या गरेर गरिने स्वार्थ प्रेरित कार्यले निरंकुशताको झझल्को दिने उनको भनाइ रहेको छ । सम्बोधनका क्रममा मल्लले औचित्यताको नाममा विधिमा छेडखानी गर्ने कार्य विधिको शासनमा विश्वास गर्नका लागि सैह्य नहुने बताइन् ।

‘विधिको शासनविरुद्ध षड्यन्त्र गर्ने विरुद्ध उठ्ने आँट, औकात र प्रतिबद्धता हामी सबैले देखाउन सक्नुपर्दछ । यस्तो भएन भने संवैधानिक प्रणाली, प्रजातान्त्रिक व्यवस्था र न्यायपूर्ण समाजको हाम्रो परिकल्पना स्वतः सुरक्षित भइरहन्छ भनेर हामी मान्न सक्दैनौँ ।’– उनले भनिन् । 

उनले संरचना भत्काएर परिवर्तन रोज्ने बाहना खोजेर आफ्नो परिवेशको उत्कृष्टता स्थापना गर्ने प्रयासले सत्तामा रहनेको धित मर्ने भए पनि विधि र विधिसंगतको अपेक्षा राख्नेको सपना भंग हुने तर्क गरिन् ।