काठमाडौं । नेकपा (एमाले)का सचिव महेश बस्नेतकी श्रीमती अम्बिका बस्नेतसहितका १० जनालाई छोड्न अदालतले आदेश दिएको छ । काठमाडौं जिल्ला अदालतले बिहीबार उनीहरुलाई धरौटीमा छोड्न आदेश दिएको हो ।  

केही दिन अगाडि धादिङकी शोभा भनिने जानुका पाठक र उनीहरुबीच घम्साघम्सी भएपछि प्रहरीले उनीहरुलाई नियन्त्रणमा लिएको थियो । पाठकले उनीहरुका विरुद्ध ज्यान मार्ने उद्योग अन्तर्गत जाहेरी दिएकी थिइन् । बिहीबार जिल्ला अदालतका न्यायाधीश महेन्द्रबहादुर कार्कीको एकल इजलासले विहीवार अम्बिका बस्नेत र शर्मिला बस्नेतलाई ५० हजार र अन्य ८ जनालाई २५ हजार धरौटीमा रिहा गर्न आदेश दिएको हो ।

अम्बिकासहित आरोपित सबैजना अदालतमा उपस्थित भएका थिए । यसरी छुट्नेहरुमा गीता बस्नेत, प्रगति थापा, सोनु बराल, जानुका बस्नेत, रेखा न्यौपाने, सबिना केसी, कमला बस्नेत र निता खत्री रहेका छन् ।