काठमाडौं । मधेश प्रदेशमा सरकार ढल्ने अवस्थामा पुगेको छ । जनमत पार्टीले समर्थन फिर्ता लिएसँगै प्रदेश सरकार अल्पमतमा परेपछि ढल्ने अवस्थामा पुगेको हो । जनमतको पछिल्लो निर्णयले मधेसमा नयाँ राजनीतिक समीकरण बन्ने सम्भावना बढेर गएको छ ।

यसअघि पनि पार्टीभित्रको अन्तरद्वन्दले जनमत पार्टीले आफ्नै नेतृत्वको सरकार ढालेको थियो । जेनजी आन्दोलनका क्रममा तत्कालीन मुख्यमन्त्री सतिशकुमार सिंहले सामाजिक सञ्जालमार्फत राजीनामाको घोषणा गरे पनि व्यवहारमा कार्यान्वयन नगरेपछि पार्टीले उनलाई हटाएर नयाँ सरकार गठनको प्रक्रिया अघि बढाएको थियो ।

नयाँ राजनीतिक परिस्थिति विकास हुँदा नेपाली कांग्रेस र नेकपाबाहेकको सरकार बनाउने कसरतमा नेकपा (एमाले) लागेको छ । १०७ सदस्यीय मधेस प्रदेश सभामा हाल १ सय जना मात्रै सांसद छन् । जस मध्ये एमालेका २४, जसपाका १८, जनमतका १२ र लोसपाको ८ सांसदसहित ६२ जना सांसद नयाँ सरकार गठनको गृहकार्यमा लागेका छन् ।

कांग्रेस नेता कृष्ण यादव गएको मंसिर १९ गते मधेसको मुख्यमन्त्री नियुक्त भएका थिए । कांग्रेससहित जसपा नेपाल, जनमत, नेकपा माओवादी केन्द्र, लोसपा, एकीकृत समाजवादी र नागरिक उन्मुक्ति पार्टीको समर्थनमा मुख्यमन्त्री नियुक्त भएका यादवलाई पछि एमालेलेसमेत विश्वासको मत दिएको थियो ।