काठमाडौं । नेपाली कम्युनिष्ट पार्टीका सह संयोजक माधवकुमार नेपालले बालेन्द्र साह नेतृत्वको सरकारले एकसय दिन पनि नपुग्दै जनविरोधी कार्य गरेको आरोप लगाएका छन् । पूर्वप्रधानमन्त्रीसमेत रहेका नेपालले वर्तमान सरकारले एकपछि अर्को जनविरोधी र मजदुरविरोधी काम गरिरहेको भन्दै कडा आलोचना गरेका हुन् । 

१३७औँ अन्तर्राष्ट्रिय श्रमिक दिवसका अवसरमा शुक्रबार काठमाडौंमा आयोजित कार्यक्रमलाई सम्बोधन गर्दै उनले सरकार सय दिन पनि नपुग्दै गलत बाटोमा हिँड्न थालेको भन्दै नसच्चिए कडा सङ्घर्षमा उत्रिने चेतावनी दिएका हुन् ।

कार्यक्रममा बोल्दै नेता नेपालले सरकारले सुकुम्बासी, मजदुर, ट्रेड युनियन अधिकार, जनताको आवास र रोजगारीको अधिकारमाथि बेवास्ता गर्दै दमनको नीति लिएको आरोप लगाए । उनले सरकारका पछिल्ला कदमहरू जायज र उचित नभएको दाबी गर्दै यस्ता गलत कामको डटेर विरोध गर्न पार्टीसम्बद्ध मजदुर नेता तथा कार्यकर्तालाई निर्देशन दिए ।