काठमाडौं ।  देशब्यापी रुपमा अनधिकृत संरचना हटाउँदै अतिक्रमित जमिन आफ्नो अधिनमा ल्याउँने अभियान चलाएको सरकारले बारा जिल्लाको जितपुरसिमरा उपमहानगरपालिकास्थित ‘सेज’को जग्गा पनि खाली गराउने भएको छ । विशेष आर्थिक क्षेत्रको रुपमा रहेको जग्गामा बनेका ६०० घर हटाउने तयारी सरकारले गरेको हो । 

विशेष आर्थिक क्षेत्र प्राधिकरणका निमित प्रमुख अजय चौधरीका अनुसार ती घर परिवारलाई हटाउनका लागि आवश्यक प्रक्रिया अगाडि बढाइ सकिएको छ । त्यसका लागि प्राधिकरण कार्यालयले उपमहानगरपालिकालाई ९ वैशाखमा पत्राचार गर्दै जग्गा अतिक्रमण हटाउन समन्वयका लागि अनुरोध गरेको चौधरीले बताए । उक्त क्षेत्रमा बनेका घर–टहरा तथा लगाइसकेका बालीनाली उठाउन र नयाँ संरचना नबनाउन तथा नयाँ बालीनाली पनि नलगाउन आग्रह गरेको उनको भनाइ रहेको छ । 

त्यसैगरी, उपमहानगरपालिकाका मेयर राजन पौडेलले पनि त्यहाँका तीन वटा वडा कार्यालयमार्फत अतिक्रमित जग्गा खाली गर्ने विषयमा सूचना दिइसकेको बताए । त्यसका लागि वडा कार्यालयहरुलाई समन्वयको लागि निर्देशन दिएको मेयर पौडेलको भनाइ रहेको छ । उपमहानगपालिकाको यस्तो तयारीसँगै अब केही दिनभित्रै उक्त क्षेत्रमा अतिक्रमित भूमि खाली गराइने भएको छ । सहायक प्रमुख जिल्ला अधिकारी छविरमण भट्टराईले कहिलेदेखि भत्काउन शुरु गर्ने भन्ने विषयमा सरोकारवालाहरुबीच छलफल चलिरहेको बताए ।