काठमाडौं । सर्वोचच अदालतले एनसेलको सेयर खरिदबिक्री विवाद प्रकरणमा अन्तरिम आदेशको छलफलका लागि पुस १६ गते दुबै पक्षलाई बोलाएको छ । मंगलबार सर्वोच्च अदालतका न्यायाधीश प्रकाशमान सिंह राउतको इजलासले दुबै पक्षलाई छलफलका लागि बोलाएको हो ।

एनसेलको सेयर खरिदबिक्रीमा घोटाला भएको भन्दै प्रतिनिधिसभाका स्वतन्त्र सांसद अमरेशकुमार सिंहले दायर गरेको रिटको सुनुवाइ लामो समयदेखि हेर्न नभ्याउनेमा पर्दै आएकोमा आज भने न्यायाधीश राउतको इजलासमा पेशीमा चढेको थियो । अधिवक्ता कीर्तिनाथ शर्मा पौडेलले उक्त इजलासबाट पुस १६ गतेका लागि दुबै पक्षलाई बोलाएको जानकारी दिए ।

अधिवक्ता पौडेलले दिएको जानकारी अनुसार १६ गते दुबैपक्षलाई बोलाएर छलफल भएपछि अन्तरिम आदेश दिन पर्ने या नपर्ने भन्ने निक्र्योलमा सर्वोच्च अदालत पुग्नेछ । मंगलबार रिट निवेदक सिंहलेसमेत बहस गरेका थिए ।

यसअघि मङ्सिर २४ गतेदेखि लगातार हेर्न नभ्याइनेमा परेको सिंहको रिट मङ्सिर पुस १ गते भने रिट निवेदककै कानुन व्यवसायीले स्थगित गराएका थिए । पुस २ गते सोमबार न्यायाधीश नहकुल सुवेदीको एकल इजलासमा परेको रिट बेञ्च बस्न नभ्याएर स्थगितमा परेको थियो ।

सिंहले मङ्सिर २२ गते शुक्रबार दायर गरिएको रिटमा एनसेल आजियटाको नेपालस्थित कार्यालय, नेपाल दूरसञ्चार प्राधिकरण, कम्पनी रजिस्ट्रारको कार्यालय, सञ्चार तथा सूचना प्रविधि मन्त्रालय, प्रधानमन्त्री तथा मन्त्रिपरिषद्को कार्यालय र आन्तरिक राजश्व विभाग मातहतको ठुला करदाता कार्यालयलाई विपक्षी बनाइएको छ ।