काठमाडौंं । नेपाली कांग्रेसका महामन्त्री गगन थापाले एउटा काण्ड सेलाउन नपाउँदै अर्को देखिन थालेको बताएका छन् । आज आइतबार सानेपामा कांग्रेसको मुखपत्र ‘नेपाल पुकार’को लोकार्पण कार्यक्रममा उनले यस्तो बताएका हुन् । 

 थापाले आफ्नो पार्टीले सरकार चलाउँदा कुशासन किन भएको छ ? भन्दै प्रश्नसमेत उठाएका छन्  ।  “पछिल्लो समय हामी को हौँ ? आज हामी सरकारमा छौँ, कुशासन छ । नागरिक कुशासनले आजित छन् । एउटा काण्ड सेलाउन नपाउँदै अर्को आउँछ,” उनले भने, “सुशासनका लागि जन्मेको पार्टी हो, हामीले सरकार चलाउँदा कुशासन किन भएको छ ? जरा कहाँ छ ?”

उनले पार्टीमा फरक शैलीबाट काम गर्नुपर्ने आवश्यकता औँल्याए । पार्टी क्यालेन्डरअनुसार नै काम गरिने उनको भनाइ छ ।

“पार्टी फरक आईडी हो भने त्यसानुसार काम गर्नुपर्छ । जाजरकोट भूकम्प र एक हजार घर बनाउने, महासमिति बैठक तयारीलगायत विषयले क्यालेन्डरअनुसार काम हुन सकेन । क्यालेन्डर रिभाइज गर्दै छौँ,” उनले भने ।